Fyrrum ítalskur knattspyrnumaður, Christian Jidayi, er látinn aðeins 38 ára að aldri eftir að hafa fundist látinn í skógi við Ravenna á Ítalíu. Dauði hans er sagður dularfullur og er nú til rannsóknar hjá lögreglu.

Jidayi var eftirlýstur eftir að hann mætti ekki til vinnu á þriðjudag, sem vakti áhyggjur samstarfsmanna hans. Þeir höfðu samband við fjölskyldu hans sem tilkynnti hvarf hans til lögreglu. Síðar sama kvöld fannst lík hans í furuskógi í Lido Adriano, nálægt Ravenna, eftir að lögregla rakti farsíma hans.

Jidayi lék sem atvinnumaður í ítölsku deildunum í rúman áratug og spilaði meðal annars í Serie A með Novara tímabilið 2011-12. Þá lék hann einnig með félögum á borð við Cesena, Pro Patria og Forli sem traustur hægri bakvörður.

Eftir að hann lagði skóna á hilluna árið 2017 sneri hann sér að þjálfun og starfaði meðal annars sem aðstoðarþjálfari hjá San Marino Calcio. Hann stýrði liðinu einnig í einum leik árið 2019.

Síðar hóf hann störf hjá lögreglunni í Ravenna og hafði nýlega staðist próf sem gerði honum kleift að ganga formlega til liðs við lögreglulið héraðsins.

Dánarorsök hefur ekki verið staðfest og rannsókn stendur yfir á andláti hans.