Helgi Fannar Sigurðsson skrifar frá Sviss

Glódís Perla Viggósdóttir æfði með íslenska landsliðinu í dag, daginn fyrir leikinn mikilvæga gegn Sviss á EM annað kvöld. Það er þó enn tvísýnt með hennar þátttöku í leiknum, en eins og flestir vita hefur hún verið að glíma við veikindi.

„Hún var ekki með alla æfinguna. Við vildum hlífa henni við mestu átökunum og sjá hvernig hún myndi bregðast við þegar hún færi að hreyfa sig og í smá átök,“ sagði Þorsteinn Halldórsson landsliðsþjálfari á blaðamannafundi í Bern rétt í þessu.

„En við erum bjartsýn, það er ekkert annað sem við getum gert núna. Við sjáum svo hvernig kvöldið og nóttin verður hjá henni,“ sagði hann enn fremur.

Ingibjörg Sigurðardóttir var á fundinum með Þorsteini í fjarveru Glódísar. Hún var spurð út í hvernig það hafi verið að spila með landsliðsfyrirliðanum í fyrri hálfleik gegn Finnum, áður en Glódís fór af velli, að því er virðist fárveik.

„Það var alls ekki skemmtilegt. Það er ekki oft sem maður sér Glódísi í þessu ástandi og ég hef aldrei spilað með henni þegar hún er svona, maður heyrði ekki neitt og sá bara hversu illa henni leið, það var mjög erfitt. Ég vorkenndi henni ekkert smá mikið og hún er hetja að ná að klára 45 mínútur. Ég skil ekki alveg hvernig hún fór að þessu,“ sagði Ingibjörg.

Ísland tapaði fyrsta leik EM gegn Finnum og þarf á sigri að halda annað kvöld.