Nokkrar ábendingar bárust vegna slæmrar framkomu foreldra á TM-mótinu í Vestmannaeyjum, sem fram fór um síðustu helgi. Voru miður skemmtileg ummæli í garð ungra stelpna látin falla.

RÚV fjallar um málið, en á TM-mótinu keppa stelpur í 5. flokki, á ellefta og tólfta aldursári, og koma liðin frá öllum landshlutum. Mótið hefur vakið mikla lukku í fjölda ára.

Lengi hefur hegðun foreldra á slíkum mótum þó verið til umræðu og og urðu einhverjir því miður uppvísir að slíkri hegðun um síðustu helgi.

„Okkur barst ábending um það í lok mótsins að einhverjir foreldrar hefðu verið með leiðinleg köll á andstæðingana. Þetta hefði verið svolítið leiðinlegt hvað þeir voru að kalla inn á völlinn og segja og svona,“ segir Sigríður Inga Kristmannsdóttir mótastjóri við RÚV.

Þá er haft eftir þjálfara á mótinu að ummæli eins og „tæklaðu þessa helvítis tussu“ og annað miður fallegt hafi heyrst í hita leiksins. Einhverjir keppendur voru með tárin í augunum vegna þeirra ummæla sem heyrðust.

„Það vill enginn sjá þessa framkomu, hvort sem það er á þessum opnu mótum sem félögin eru að halda eða Íslandsmótum eða bikarkeppni. Við viljum ekki sjá svona framkomu foreldra gagnvart ungum iðkendum,“ segir Sigríður.

Á einhverjum barnamótum hér á landi hefur verið gripið til aðgerða til að stemma stigu við ólátum foreldra á hliðarlínunni. Á Símamótinu, sem haldið er ár hvert á vegum Breiðabliks, eru foreldrar sem haga sér illa áminntir með svokölluðu bleiku spjaldi.