Helgi Fannar Sigurðsson, Hrafnkell Freyr Ágústsson og Hörður Snævar Jónsson fóru yfir allt það helsta í Íþróttavikunni á 433.is, en þættirnir koma út vikulega á 433.is.

Það er bras á Val í Bestu deild karla og tapaði liðið 3-0 gegn FH í síðustu umferð. Liðið og Túfa þjálfari hafa fengið mikla gagnrýni en Hörður lagði það til í þættinum að Valsarar þurfi að hafa Aron Jóhannsson í stuði svo hlutirnir gangi upp.

„Seinni hálfleikurinn þeirra gegn Víkingi var besta frammistaða þeirra í sumar. Ég tel að það sé vegna þess að Aron Jóhannsson var í gír. Þeir þurfa hann af lífs og sálar kröftum í þeim gír. Hann er stemningsmaður, nær að lemja menn svolítið með sér. Hann og Hólmar þurfa að taka þetta lið núna áfram með einhverjum karakter,“ sagði Hörður.

„Við getum líka horft í leikinn gegn Vestra, þar sem hann kemur inn á og hefur góð áhrif á leikinn,“ skaut Helgi þá inn í.

„Það er búið að tala um að allir þjálfararnir séu ómögulegir. Þetta er svolítið síðasti séns fyrir ákveðna menn þarna að líta í eigin barm og taka ábyrgðina,“ sagði Hörður enn fremur um Val.