Það eru margir farnir að kannast við strák sem ber nafnið Jamie Gittens en hann spilar með Dortmund í Þýskalandi.

Leikmaðurinn er enskur og kom til Þýskalands 2020 og spilaði sinn fyrsta aðalliðsleik fyrir Dortmund 2022.

Þýskir miðlar greina frá því að Gittens sé óánægður með laun sín hjá félaginu en hann fær um 47 þúsund pund á viku.

Það eru ansi góð laun fyrir tvítugan strák en en hann vill fá hækkun í sumar eða þá færa sig um set og aftur til Englands.

Gittens hefur spilað 44 leiki á tímabilinu og skorað 12 mörk eftir að hafa skorað aðeins tvö mörk á síðasta tímabili.

Gittens er sagður heimta 120 þúsund pund á viku ef hann á að framlengja samning sinn við Dortmund sem er gífurleg hækkun.

Vængmaðurinn er orðaður við endurkomu til Englands en hann var í unglingaliðum bæði Chelsea og Manchester City.