Hörður Snævar Jónsson og Helgi Fannar Sigurðsson fóru yfir Meistaradeildina í Íþróttavikunni á 433.is. Þar skoraði Viktor Bjarki Daðason aftur fyrir FC Kaupmannahöfn á dögunum.

Viktor Bjarki Daðason heldur áfram að slá í gegn með FC Kaupmannahöfn. Skoraði hann sitt annað mark í Meistaradeildinni á dögunum og varð þar með yngsti leikmaður í sögu keppninnar til að skora í mismunandi leikjum.

Það vakti athygli fyrir fáeinum vikum þegar Viktor Bjarki var ekki í leikmannahópi Arnars Gunnlaugssonar í íslenska landsliðinu fyrir leiki gegn Aserbaísjan og Úkraínu, þar sem Strákarnir okkar duttu út í undankeppni HM.

„Þetta fær mig til að hugsa um Úkraínuleikinn fyrir nokkrum vikum síðan, að íslenska landsliðið hafi leyft sér það að geyma svona mann í einhverju yngra landsliði þegar við erum að fara í þetta mikilvæga leiki.

Hann var byrjaður að skora og leggja upp í stærsta liðinu í Danmörku. Við vorum með Sævar Atla í meiðslum og það var þunnur þrettándi fram á við. Leikmaður sem er nógu góður til að byrja Meistaradeildarleik með FCK er nógu góður til að vera í íslenska landsliðshópnum, þó hann þurfi ekki að byrja leikinn,“ sagði Hörður.

Umræðan í heild er í spilaranum.