Viktor Bjarki Daðason setti met í Meistaradeildinni í gær þegar hann kom FCK yfir í sigri á Kairat Almaty frá Kasakstan. Hefur hann fengið mikið lof síðan.

Þetta var annað mark Viktors í Meistaradeildinni á þessari leiktíð, en hann skoraði gegn Dortmund í haust. Nú er ljóst að Viktor er yngsti leikmaður í sögu Meistaradeildarinnar til að skora í tveimur mismundandi leikjum. Lamine Yamal átti metið áður.

Viktor kom til FCK frá Fram í fyrra og hefur hann verið að koma meira og meira inn í aðalliðið undanfarnar vikur og er hann heldur betur að slá í gegn. Margir kalla eftir því að Viktor eigi að vera fastamaður í byrjunarliði danska stórliðsins.

Danskir miðlar, sem og miðlar víðar, skrifuðu afar vel um Viktor eftir afrek hans í gær.

„Meistaradeildartöfrarnir halda áfram hjá Viktori. Þvílíkir mánuðir sem þessi 17 ára gamli framherji er að eiga. Líkamlega getur hann barist við stóru strákana og hann verður skepna eins og Andreas Cornelius ef hann bætir við sig nokkrum kílóum af vöðvum. Hrikalega lítur hann vel út!“ segir til að mynda í Tipsbladet.

„Neestrup hefur fundið níuna sína,“ segir í Campo, en Jacob Neestrup er stjóri FCK. „17 ára gamall Viktor Daðason er að eiga ótrúlega byrjun á ferli sínum í Meistaradeildinni,“ segir þá hjá One Football sem hundruðir þúsunda fylgja.