Manchester City hefur verið sektað um 800 þúsund pund eftir brot á reglum ensku úrvalsdeildarinnar um stundvísi.

Lið City var níu sinnum of seint að koma sér út á grasið fyrir leik eða áður en seinni hálfleikur hófst á síðustu leiktíð og er því sektað.

Félagið hefur samþykkt þessa sekt, beðist afsökunar og minnt starfsfólk sitt á mikilvægi þess að fylgja reglum um hvenær skuli mæta til leiks.

Þetta er ótengt þeim 130 ákærum sem City hefur hlotið vegna brota á fjármálareglum. Það mál er af mun alvarlegri toga og á niðurstaða eftir að koma í ljós.

Gæti hún haft í för með sér mun harðari refsingu, hærri sektir eða jafnvel stigafrádrátt.