Neymar gæti snúið aftur til Evrópu í sumar og spilað í Meistaradeildinni á næstu leiktíð, ef marka má föður hans.

Neymar, sem er 33 ára gamall, sneri aftur heim til Santos í Brasilíu og skrifaði undir stuttan samning í vetur. Það gerði hann eftir að hafa fengið samningi sínum við sádiarabíska félagið Al-Hilal rift eftir meiðslahrjáða dvöl þar.

Nú er samningurinn við Santos að renna út og þó faðir hans segi það góðan möguleika á að hann verði áfram kemur til greina að söðla um á ný.

„Markaðurinn er mjög áhugasamur. Við erum að fara til Miami að ræða við félög í þessari viku og það er áhugi frá Evrópu, sum félaganna eru í Meistaradeildinni,“ segir hann.

„Það eru góðar líkur á að hann verði áfram hjá Santos en við hlustum samt á önnur tilboð.“

Þá segir hann að draumur sonar síns sé að vinna HM með brasilíska landsliðinu á næsta ári. „Ég sé Neymar spila með Vini, Rodrygo og Raphinha þar.“