Höskuldur Gunnlaugsson ræddi við Stöð 2 Sport í kvöld eftir leik Breiðabliks við Aftureldingu í Bestu deildinni.

Höskuldur skoraði fyrsta mark Bestu deildarinnar árið 2025 en hann kom boltanum í netið úr vítaspyrnu í 2-0 sigri.

Fyrirliðinn hrósaði Aftureldingu fyrir þeirra nálgun í þessum leik en var einnig nokkuð ánægður með frammistöðu sinna manna.

,,Það er hrós á þá, þeir seldu sig dýrt og voru hugrakkir að spila. Þeir komu inn í seinni hálfleikinn með öðruvísi leikplan sem gerði það að verkum að pressan okkar sem var góð var ekki jafn kröftug,“ sagði Höskuldur við Stöð 2 Sport.

Höskuldur eignaðist dóttur stuttu fyrir leik eða um miðnætti í gær og gat varla fagnað því betur en með marki í kvöld.

,,Það er hárrétt, það var lítil prinsessa sem kom rétt eftir miðnætti og það var viðeigandi að fagna komu hennar með marki og góðum opnunarleik, takk kærlega.“

,,Í fyrri hálfleik vorum við vel ‘syncaðir’ og sköpuðum fleiri færi. Þetta var öflug frammistaða heilt yfir. Ég verð að gefa þeim credit, mér fannst þeir stíga upp.“