Það er ljóst að Aron Einar spilar ekki meira með félagsliði sínu, Al-Gharafa í Katar, á þessari leiktíð. Reynsluboltinn gekk í raðir félagsins síðasta haust en var aðeins skráður í hópinn í Meistaradeild Asíu, þar sem Al-Gharafa er úr leik.
„Í hans tilfelli sneri þetta að því að hann var í standi. Er hann búinn að spila nógu mikið af leikjum? Nei, en hann er búinn að spila sterka leiki, gegn sterkum andstæðingum og lítur mjög vel út. Hann er búinn að æfa mjög vel í 2-3 mánuði. Ég vildi fá hann inn sem þann sterka leiðtoga sem hann er innan hópsins,“ sagði Arnar við 433.is í dag.
Aron tók slaginn með uppeldisfélagi sínu Þór í næstefstu deild íslenska boltans í fyrra. Fyrrum landsliðsþjálfarinn Age Hareide vildi ekki velja hann í landsliðshópinn á meðan hann lék á því stigi. Það hefur verið talað um að Aron snúi aftur til Þórs í sumar og var Arnar spurður að því hvort afstaða hans væri sú sama og forvera hans í þessum efnum.
„Ég var sammála honum á þeim tímapunkti sem hann sagði þetta. En ég hafði aldrei verið með honum í hóp áður. Svo kom hann á tvær æfingar í Víkinni og þá sá ég hversu öflugur karakter hann er og gefur mikið af sér. Svo kynnist ég honum betur í þessum hóp og það eru ansi margir þættir sem þarf að vega og meta áður en maður getur svarað svona spurningum,“ sagði Arnar og hélt áfram.
„Í hinum fullkomna heimi verður hann enn þá úti og spilar í sem bestum aðstæðum svo við séum alltaf að fá Aron Einar í toppstandi.“
Íslandi mætir Kósóvó í tveimur leikjum 20. og 23. mars í umspili um að halda sæti sínu í B-deild Þjóðadeildarinnar.
Ítarlegt viðtal við Arnar er í spilaranum.
