Hinn tvítugi Orri er framherji Real Sociedad og mun taka við bandinu af Aroni Einar Gunnarssyni sem hefur borið það í mörg ár. Í fjarveru Arons hefur Jóhann Berg Guðmundsson verið fyrirliði.
„Ég taldi rétt að fyrirliðinn yrði fulltrúi nýrrar kynslóðar. Mér finnst þeir vera tilbúnir og held þeir hafi viljað fá rödd. Þeir vilja sýna fram á að þeir eru ekki bara töffarar á blaði. Orri er gríðarlega stoltur, ánægður og tilbúinn í þetta,“ sagði Arnar um málið í samtali við 433.is í dag.
Arnar var þá spurður út í viðbrögð annarra, til að mynda Arons, við því að Orri væri nýr fyrirliði landsliðsins.
„Ég ætlast til þess að eldri leikmenn sætti sig við þessa ákvörðun og geri sér grein fyrir að þeir séu enn leiðtogar þó þeir beri ekki armbandið. Innst inni er ekkert gaman að tilkynna leikmönnum sem eru búnir að vera fyriliðar í 200 ár og með yfir 100 landsleiki að þeir séu ekki lengur fyrirliðar.
Eins og ég segi við alla þegar ég segi þeim slæmar fréttir er að þeir mega vera í fýlu í 5 sekúndur og svo bara áfram gakk. Þeir sýndu þroska og skilning. Aron var í þessari sömu stöðu fyrir 10-15 árum þegar hann fékk keflið á svipuðum aldri þannig hann sýndi hvað mestan skilning á þessu,“ sagði Arnar.
Ítarlegt viðtal við hann er í spilaranum.
