Kjaftasögur um að Grindavík sé að skoða það að leggja niður fótboltaliðið sitt eru úr lausu lofti gripnar. Félagið ætlar sér að bæta í, þetta segir Haukur Guðberg Einarsson formaður knattspyrnudeildar í samtali við 433.is.

Grindavík ætlar á næsta ári að vera áfram með meistaraflokk karla og kvenna auk þess sem félagið mun halda úti 2. flokki. Árið hefur reynst Grindvíkingum erfitt sem þurftu að yfirgefa bæinn sinn fyrir um ári síðan.

Félaginu tókst að halda úti starfi sínu og var með aðstöðu í Safamýri í ár, líklegt er að félagið færi sig um set í vetur og finni sér nýtt tímabundið heimili.

„Eina sem ég get sagt er að við verðum með aðeins betra lið á næstu ári, það er enginn uppgjöf hérna,“ segir Haukur Guðberg Einarsson í samtali við 433.is en bæði karla og kvennalið félagsins héldu sætum sínum í Lengjudeildinni  í sumar.

Hann segir unnið að því að finna félaginu samastað fyrir næstu leiktíð. „Að öllum líkindum verðum við ekki í Safamýrinni, við erum að vinna í öðru. Við verðum með karla og kvennalið og 2. flokk.“

Haukur segir það á sinni ábyrgð að halda starfinu úti á meðan ekki er hægt að vera í Grindavík, það sé svo á hans ábyrgð að koma félaginu á endanum aftur heim þegar náttúruöflin á Suðurnesjum leyfa það.

„Við erum komnir fram úr Vestmannaeyjum, við erum að skrifa nýja sögu í íslenskri knattspyrnu. Það er mín ábyrgð sem formaður knattspyrnudeildar Grindavíkur, að koma þeim í var og koma þeim heim aftur. Það er eina stefnan mín, hún hefur ekki breyst,“ segir Haukur.