Systir hinnar umdeildu Lauryn Goodman hefur engan áhuga á að tala við hana eða fyrirgefa henni fyrir það sem hún gerði Walker fjölskyldunni í tvígang.
Lauryn er ansi umdeild á Englandi en hún hefur tvívegis verið nálægt því að skemma hjónaband enska landsliðsmannsins Kyle Walker og eiginkonu hans, Annie Kilner.
Walker er alveg jafn sekur í málinu en hann er giftur Annie og hefur allavega tvisvar haldið framhjá eiginkonu sinni með Lauryn sem varð til þess að þau eignuðust tvö börn saman.
Chloe Goodman, systir Lauryn, er ekki tilbúin að fyrirgefa systur sinni fyrir þessa hegðun og er í raun ekki víst að þeirra samband muni á einhverjum tímapunkti ná fullum bata.
,,Ég held að þetta snúist ekki bara um fyrirgefningu, þetta snýst um tímasetningu. Ég er ekki tilbúin í að setjast niður og ræða hlutina við hana,“ sagði Chloe.
,,Ég er viss um að tilfinningarnar myndu taka yfir, ég yrði reið og gæti sagt hluti sem ég myndi sjá eftir.“
,,Ég var í losti eftir að hafa komist að því að hún væri ófrísk í annað sinn því ég vissi ekki að þau hefðu byrjað sambandið aftur.“
,,Ég ræddi ekki við Kyle eða spurði hann hvort hann væri að hitta systur mína því ég bjóst við því að ekkert væri í gangi.“
,,Lauryn sagði ekkert við mig og vegna þess þá hef ég enga samúð með henni eða Kyle í þessu máli.“
