Aron Einar Gunnarsson var kynntur sem leikmaður Þórs á Akureyri í dag, hann snýr heim í uppeldisklúbbinn eftir átján ár í atvinnumennsku.

Þó Aron sé mættur heim eru miklar líkur á því að hann fari erlendis á næstu vikum, Aron yrði þá lánaður frá Þór. Aron er með möguleika á borðinu bæði í Katar og í Belgíu.

„Manni líður eins og maður sé mættur heim, Þórsarar komnir saman. Þetta er mitt félag og gaman að fá þessar móttökur,“ sagði Aron Einar í ítarlegu spjalli við 433.is.

Aron opnaði aldrei á neitt annað lið á Íslandi og vildi halda þangað sem hann ólst upp.

„Ég opnaði aldrei á neitt samtal varðandi það á Íslandi, planið var alltaf að koma og klára hérna heima. Planið er að koma mér í gang og spila eins og maður, svo sjáum við til hvort ég fari á lán í lok gluggans til Evrópu eða Katar. Ég þarf að koma mér í gang.“

Aron Einar hefur síðasta árið glímt við talsvert af meiðslum en er á batavegi og mun koma við sögu í næstu leik Þórs sem er eftir níu daga á heimavelli.

„Þetta er langur aðdraganda að þessum meiðslum, við ákváðum fyrir átta mánuðum að fara í aðgerð. Það tekur tíma að jafna sig þegar maður er kominn á þennan aldur, mér líður eins og ég sé alveg að koma heima og saman.“

Metnaður Arons Einars er að spila aftur fyrir íslenska landsliðið. Hann hefur spilað 103 landsleiki og vill ljúka ferlinum þar á eigin forsendum. „Landsliðið hefur alltaf verið aðalatriðið fyrir mig, það hefur verið erfitt síðasta eina og hálfa árið að vera á hliðarlínunni.“

„Ég vil enda þetta á mínum forsendum í stað þess að vera meiddur á hliðarlínunni, ef ég kem ekki til með að hjálpa liðinu þá verð ég ekki valinn.“

Viðtalið er í heild hér að ofan.