Eins og frægt er þá er búið að dæma miðjumanninn Paul Pogba í fjögurra ára bann fyrir að hafa fallið á lyfjaprófi.

Útlit er fyrir að ferill Pogba sé einfaldlega búinn en hann er leikmaður Juventus á Ítalíu í dag.

Pogba verður 31 árs gamall þann 15. mars og má ekki spila atvinnumannabolta fyrr en 2028.

Talið er afskaplega líklegt að Pogba snúi ekki aftur en hann fór í lyfjapróf eftir leik Juventus við Udinese þann 20. ágúst 2023.

Massimiliano Allegri, stjóri Juventus, er miður sín yfir stöðunni og hefur tjáð sig um málið.

,,Ég sendi honum skilaboð fyrir tveimur dögum. Ég vorkenni honum sem manneskju,“ sagði Allegri.

,,Ekki bara það heldur vorkenni ég hans knattspyrnuferli. Þessi íþrótt er að missa sjaldgæfan leikmann sem ég fékk að njóta að þjálfa, fyrir utan það þá er Paul mjög góð manneskja.“