Gunnar Birgisson fréttamaður RÚV og sérfræðingur í hlaðvarpinu Dr. Football segir að Víkingar hafi afþakkað boð úr Kópavoginum um að koma fleirum á völlinn á sunnudag.

Víkingur og Breiðablik mætast í úrslitaleik Bestu deildarinnar á sunnudag í Víkinni, 2500 miðar fóru í sölu en Gunnar heldur því fram að það hefði verið hægt að koma fleirum á svæðið.

Hann fullyrðir að Breiðablik hafi boðist til þess að bera kostnað af því en aðeins 250 stuðningsmenn liðsins fengu miða. „Það sem er staðreynd í þessu að Blikarnir buðust til þess að græja allt saman, græja gæslu og redda bráðabirgðar stúku. Því var hafnað,“ sagði Gunnar í Dr. Football í dag.

Gunnar segir frá því hvaða hugmyndir Blikar hafi sett fram. „Það hefði verið auðvelt að taka skiltin sem eru við hlið varmannabekkja og sjást ekki í útsendingunni, það hefði verið hægt að taka girðingu niður öðru hvoru megin við markið og hafa stúkur þar.“

„Það er ótrúleg synd, ég fer í ræktina og sund í morgun. Þar er gamla fólkið að ræða þennan leik, mér líður eins og það séu allir að tala um þennan leik. Mér finnst það  synd að það verði 2500 manns, það er tækifæri til þess að selja 6 til 7 þúsund miða.“

„Við gætum búið til viðburð sem myndi marka djúp spor í söguna, gera palla eða eitthvað allan hringinn.“

Kjartan Henry Finnbogason var með Gunnari í þætti dagsins, hann telur þetta hafa verið hæpið plan. „Það eru svakalegar framkvæmdir fyrir einn leik að taka niður girðingar og eitthvað,“ sagði Kjartan og minnti á að leikurinn væri í beinni á Stöð2 Sport.