Gunnar Birgisson og Tómas Steindórsson voru gestir þeirra Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Í þættinum var farið um víðan völl og meðal annars rætt um Frey Alexandersson, þjálfara Kortrijk, sem var orðaður við Cardiff í vikunni. Sami eigandi á belgíska liðið og það enska, en Freyr náði mögnuðum árangri með Kortrijk eftir að hann fór frá Lyngby og tók við liðinu í upphafi árs.

Belgískir miðlar héldu því fram í vikunni að Freyr hefði gert sér upp veikindi til að fara í viðræður við Cardiff. Hann þvertók sjálfur fyrir það og hlaut að lokum afsökunarbeiðni frá blaðamönnum vegna rangfærslna. Það verður þó enn að teljast möguleiki á að Freyr fari til velska félagsins fyrr eða síðar, en félagið rak stjóra sinn á dögunum.

„Ég held klárlega að það sé enn möguleiki að hann fari þangað. Ég veit ekki hvort hann hafi sagt það opinberlega en margir tala um það að það hafi verið markmið hjá honum frá því hann byrjaði að þjálfa að þjálfa á Englandi. Cardiff er mjög spennandi klúbbur og verkefni sem hann kannast við, að taka við liði í erfiðri stöðu og bjarga því frá falli,“ sagði Gunnar í þættinum og tók Tómas undir.

„Auðvitað stefnirðu alltaf hærra. Það er ekki hápunkturinn eða endastöðin að vera í Belgíu. Auðvitað stefnirðu frekar á Cardiff, sem er risaklúbbur.“

Gunnar hefur tröllatrú á Frey og að hann gæti gert góða hluti í enska boltanum.

„Hann hefur getið sér gott orð alls staðar sem hann hefur verið. Hann verður örugglega líka goðsögn í Kortrijk, sem er magnað.“

Hrafnkell telur líklegt að Freyr taki við Cardiff, sem er á botni ensku B-deildarinnar, einn daginn en ekki nú.

„Ég held hann taki ekki við þeim núna en það kemur að því. Þetta eru sömu eigendur og hann hefur vitað það frá byrjun að lokamarkmiðið í þessu starfi er Cardiff.“

Umræðan í heild er í spilaranum.

Íþróttavikan er í boði Bola léttöl og Lengjunnar