Manchester United ætti að sætta sig við slæm kaup og reyna að selja brasilíska vængmanninn Antony sem fyrst.

Þetta segir fyrrum enski landsliðsmaðurinn Joe Cole en Antony gekk í raðir United frá Ajax árið 2022.

Antony hefur aðeins spilað eina mínútu í deildinni á tímabilinu hingað til og virðist vera mjög neðarlega á lista Erik ten Hag yfir þá leikmenn sem hann vill nota.

Það var búist við miklu af Antony sem kostaði United 86 milljónir punda en hann hefur hingað til alls ekki staðist væntingar í Manchester.

,,Vandamálið með Antony hjá Manchester United er einfaldlega það að hann er leikmaður sem hentar hollensku deildinni fullkomlega,“ sagði Cole.

,,Líkamlega þá er hann í vandræðum í ensku úrvalsdeildinni. Hann er hæfileikaríkur fótboltamaður með tækni og töfra og það var gaman að sjá hann standa sig gegn Barnsley.“

,,Ég sé hann hins vegar ekki gera gæfumuninn í byrjunarliði United og heldur ekki snúa blaðinu við á Old Trafford.“