Knattspyrnudeild Fylkis hefur staðfest það að búið sé að ná samkomulagi við nokkra leikmenn liðsins varðandi launagreiðslur.
Eins og greint var frá í dag þá er Fylkir í ákveðnum fjárhagsvandræðum en Ríkharð Óskar Guðnason, íþróttafréttamaður hjá Stöð 2, greindi fyrst rá.
,,Ég ætla að koma með skúbb, hafið þið heyrt að það sé litið til í bankanum í Árbænum? Ég hef heyrt frá tveimur leikmönnum, að þeir hafi verið spurðir hvort það sé hægt að bíða með launagreiðslur,“ sagði Ríkharð Óskar í Þungavigtinni.
Fylkir hefur nú gefið frá sér tilkynningu vegna fréttarinnar og þar kemur fram að ákveðið samkomulag hafi náðst við ónefnda leikmenn.
,,Það sem er rétt í því sem fram kemur í DV er að í gegnum opið og heiðarlegt samtal hefur verið samið við nokkra leikmenn Fylkis um að deildin greiði þeim seinna en upphaflega var áformað,“ segir í tilkynningunni.
Fylkir tekur einnig fram að slíkar aðstæður hafi gerst áður í Árbænum en að lokum verður að sjálfsögðu gert upp við leikmennina.
Það verður því að teljast ólíklegt að Fylkir muni styrkja sig mikið fyrir fallbaráttuna sem er framundan seinni hluta tímabils.
