Stuðningsmenn Newcastle á Englandi voru steinhissa og skellihlæjandi er þeir heyrðu viðtal við ungan japanskan dreng á dögunum.

Þessi strákur var mættur á leik Newcastle og Urawa Reds í Japan á dögunum en honum lauk með 4-1 sigri enska liðsins.

Strákurinn ber heitið Ucha en hann hefur stutt Newcastle frá árinu 2014 eftir leik Newcastle og Hull í ensku úrvalsdeildinni.

Ástæðan er þó ansi undarleg en hann man vel eftir atviki sem átti sér stað í þeim leik á milli Alan Pardew og David Meyler.

Pardew var stjóri Newcastle á þeim tíma en hann skallaði þá leikmann Hull, Meyler, og fékk að launum 100 þúsund pund í sekt.

,,Fyrir um tíu árum þá horfði ég á leik gegn Hull City. Þessi leikur var klikkaður,“ sagði Ucha.

,,Alan Pardew skallaði annan mann! Það var fyrsti leikurinn sem ég horfði á og ég varð ástfanginn um leið.“