Curtis Jones, leikmaður Liverpool, gæti hafa skotið létt á fyrrum stjóra liðsins, Jurgen Klopp, er hann ræddi við blaðamann um Arne Slot.
Slot er nýr stjóri Liverpool en hann tók við félaginu í sumar eftir að Klopp hafði unnið þar í níu ár.
Jones hefur unnið með Slot í örfáa mánuði en hefur víst aldrei verið ánægðari sem leikmaður liðsins – að eigin sögn.
Margir vilja meina að Jones sé að skjóta aðeins á Klopp með þessum ummælum en hann fékk takmarkaðan spiltíma undir stjórn Þjóðverjans.
,,Hann er stórkostlegur, ég hef líklega aldrei verið ánægðari,“ sagði Jones í samtali við blaðamenn.
,,Hans spilamennska hentar mínum leikstíl gríðarlega vel, leikplanið er mjög skýrt. Arne tekur þátt í öllum æfingum og þjálfar okkur sem leikmenn, hann hugsar mikið um smáatriðin.“
,,Hann veit að þetta verkefni mun taka ákveðinn tíma því breytingarnar eru miklar.“
