Rodri, leikmaður Manchester City, hefur undirstrikað það hversu sáttur hann er hjá félaginu í kjölfar ummæla liðsfélaga hans úr spænska landsliðnu, Dani Carvajal, um að hann vildi fá hann til Real Madrid.

Rodri hefur sannað sig sem einn besti miðjumaður heims undanfarin ár og unnið allt sem hægt er að vinna með City. Nú er hann kominn í úrslitaleik Evrópumótsins með Spáni.

„Ég segi honum á hverjum degi að fara frá Manchester og flytja í sólina. Að við þurfum hann í Madrid og að hann sé héðan,“ sagði Carvajal í nýju viðtali.

Rodri segist hins vegar hæstánægður þar sem hann er.

„Ég er mjög, mjög ánægður á Englandi,“ segir hann.

„Ég er hjá einu besta liði í heimi og ég er svo ánægður. Ég er með þriggja ára samning en við sjáum hvað setur þegar að því kemur.“