Gary Neville, goðsögn Englands, var virkilega óánægður með dómgæsluna í leik landsliðsins gegn Hollandi í gær.
England fékk vítaspyrnu í fyrri hálfleik sem Harry Kane skoraði úr en Denzel Dumfries gerðist brotlegur – hann fór með takkana í Kane eftir að framherjinn hafði skotið að marki.
Dómarinn skoðaði atvikið í VAR og dæmdi víti en Neville var svo sannarlega ekki sammála þeirri ákvörðun.
,,Sem varnarmaður þá er ég á því máli að þessi ákvörðun hafi verið til skammar,“ sagði Neville í hálfleik.
,,Hefði ég fengið þessa vítaspyrnu á mig á mínum ferli og hvað þá í svona mikilvægum leik… Hann reynir að fara fyrir skotið. Þetta er ekki vítaspyrna.“
,,Þetta er ekki nálægt því að vera vítaspyrna, það voru ekki margir enskir leikmenn að biðja um neitt heldur.“
