KA vann HK í Kórnum í fyrsta leik kvöldsins í Bestu deild karla.

Ekkert var skorað í fyrri hálfleik en snemma í þeim seinni kom Bjarni Aðalsteinsson gestunum frá Akureyri yfir eftir hornspyrnu. Það er þó erfitt að fullyrða að boltinn hafi verið allur kominn yfir línuna.

Hallgrímur Mar Steingrímsson fór langt með að klára leikinn fyrir KA með marki á 82. mínútu en HK minnkaði muninn með marki Arnþórs Ara Atlasonar í uppbótartíma.

Heimamenn reyndu að finna jöfnunarmark á lokaandartökum leiksins og vildu fá vítaspyrnu í blálokin, en allt kom fyrir ekki. Lokatölur 1-2 og sigurinn heilt yfir sanngjarn.

HK er í níunda sæti deildarinnar með 13 stig, 2 meira en KA sem er sæti neðar. Tveir sigrar í röð hjá Norðanmönnum sem eru komnir upp úr fallsæti.