Það kom upp óhugnanlegt atvik í leik Ungverjalands og Skotlands á EM í gær. Þá féll Barnabas Varga meðvitundarlaus til jarðar eftir högg frá markverðinum Angus Gunn, en þeir kljáðust um boltann.

Varga lá meðvitundarlaus um tíma en var að lokum borinn af velli og farið með hann á sjúkrahús. Ungverska knattspyrnusambandið staðfesti í gærkvöldi að Varga væri með meðvitund og ástand hans stöðugt, en að hann þyrfti sennilega að fara í aðgerð.

Meira
Varga er með meðvitund og er ekki í lífshættu – Spilar ekki meira á mótinu

Starfsmenn BBC, sem sýndi frá leiknum í Bretlandi, sögðust hissa á að UEFA hafi skömmu eftir atvikið ákveðið að endursýna það. Þegar endursýning var nýhafin var hins þó skipt yfir í víðara skot.

„Við vorum eins hissa og þið að UEFA skildi endursýna atvikið. Það eru verkferlar sem fara í gang þegar svona lagað gerist eftir það sem kom fyrir Christian Eriksen fyrir þremur árum,“ sagði Gabby Logan á BBC.

„Þess vegna skiptum við yfir í víðara skot eins fljótt og auðið var,“ sagði hún enn fremur.