Adam Ægir Pálsson, leikmaður Vals, var gestur í nýjasta þætti af Íþróttavikunni á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Það var að sjálfsögðu rætt um stórleik Vals og Víkings í Bestu deild karla á dögunum, en honum lauk 2-2 eftir hádramatík í lokin.

„Stundum snýst þetta um að sætta sig við gott jafntefli á móti góðu liði. Við vorum búnir að tapa síðustu tveimur leikjum á móti þeim svo það var fínt að breyta aðeins,“ sagði Adam og bætti við að Valsarar hafi ekki verið of uppteknir af þeirri staðreynd að þeir máttu ekki við tapi, vildu þeir ekki missa Víking of langt frá sér í deildinni.

„Hugsunin var ekkert þannig í leiknum. Undirbúningurinn var góður og það var góður andi í hópnum. Þetta var ekkert stress. Mér leið alltaf eins og markið væri að koma.

Ég held að menn séu líka bara spenntir að spila svona leiki. Eins og Hólmar sagði við mig í gær, að hann væri til í að spila við Víking aftur á morgun. Margir á vellinum, góð umgjörð og góðir leikmenn á móti hvorum öðrum.“

Það voru vafaatriði í leiknum og sérstaklega þegar Valur fékk dæmda seinni vítaspyrnu sína. Þá braut Ingvar Jónsson markvörður á Guðmundi Andra Tryggvasyni. Gylfi Þór Sigurðsson fór á punktinn og skoraði sitt annað mark í leiknum.

„Ég er ekki hlutlaus og ætla ekki að fara stuða menn hérna. En já, mér fannst það. En ef Víkingur hefði fengið þetta víti hefði ég sennilega farið að væla,“ sagði Adam um þetta vafaatriði.

„Mér fannst við eiga þetta skilið. Við höfum fengið nokkur vafaatriði á móti okkur í sumar og þeir nokkur með sér. Stundum er þetta svona, þetta jafnast allt út.“

Umræðan í heild er í spilaranum.