Adam Ægir Pálsson, leikmaður Vals, var gestur í nýjasta þætti af Íþróttavikunni á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Adam hefur verið inn og út úr byrjunarliði Vals á tímabilinu og oft komið inn af bekknum. Hann er eðlilega ekki sáttur með það en áttar sig á að samkeppnin er hörð.

„Maður vill spila allar mínútur og það er ekki gaman að vera á bekknum. Vonandi fer þetta að breytast,“ sagði Adam.

„Við erum allir mjög góðir leikmenn, sérstaklega á köntunum en í öllum stöðum. Það er bara hörð samkeppni en hún gerir okkur líka betri. Ef þeir eru ekki á tánum kem ég inn og delivera – og öfugt.

Ég fékk leikinn á móti Breiðabliki og honum fannst ég kannski ekki nógu góður þannig ég fór aftur á bekkinn. Þegar ég fæ kallið næst verð ég tilbúinn.“

Adam er þó ansi sáttur hjá Val, þó spiltíminn mætti vera meiri.

„Mér líður ótrúlega vel á Hlíðarenda. Ég elska Val og mér hefur verið tekið opnum örmum þarna síðan ég kom. Ég mun alltaf borga þeim til baka.

Þetta er fjölskylduklúbbur. Ég þekki alla í handbolta- og körfuboltaliðinu. Maður þekkir fólkið í stjórninni. Það er mjög næs að vera þarna.“

Umræðan í heild er í spilaranum.