Hjörvar Hafliðason, stjórnandi Dr. Football segir að stuðningsmenn Víkings sjái rautt þegar Ólafur Jóhannesson mætir á skjáinn og ræðir um íslenska boltann. Ólafur var sérfræðingur Stöð2 Sport á leik Vals og Víkings á þriðjudag.

Ólafur er fyrrum þjálfari Vals og hefur starfað í kringum félagið undanfarið sem ráðgjafi.

„Ég var að tala við vini mína sem halda með Víking, ég er ekki maður samsæriskenninga. Hafið þið lesið um Calciopoli skandalinn, þar sem Juventus voru að koma sínu fólki að í sjónvarpsþáttum að segja sínar skoðanir. Setja pressu á dóamra og allt svona,“ sagði Hjörvar í þætti sínum í dag

„Það fer óheyrilega í taugarnar á stuðningsmönnum Víkings að Óli Jó sé þarna á Stöð2 Sport, þeir sjá rautt þegar þeir sjá hann. Hann er í vinnu hjá Val, er ráðgjafi þeirra. Víkingar eru mjög ósáttir.“

Málarinn geðugi, Hrafnkell Freyr Ágústsson segir að svona virki hlutirnir bara á Íslandi. „Svona er bara Ísland, það eru ekki margir úr að velja,“ segir Hrafnkell.

Ólafur er einn færasti þjálfari í sögu Íslands en hann hefur ekki þjálfað síðustu tvö ár.