Íþróttavikan kemur út í hverri viku á 433.is og í Sjónvarpi Símans. Helgi Fannar Sigurðsson og Hrafnkell Freyr Ágústsson hafa umsjón með þættinum og með þeim í setti í þetta skiptið var Hörður Snævar Jónsson.

Íslenska karlalandsliðið spilaði tvo vináttuleiki á dögunum, gegn Englandi og Hollandi. Í þeim fyrri byrjuðu þeir Sverrir Ingi Ingason og Daníel Leó Grétarsson í miðvarðastöðunum en Daníel var meiddur gegn Hollandi. Inn kom Valgeir Lunddal Friðriksson. Það vakti furðu einhverra en Valgeir er að upplagi bakvörður og á bekknum var Brynjar Ingi Bjarnason.

„Það var örugglega planið að spila Sverri og Daníel í báðum leikjunum. Svo meiðist Daníel. Þá gætu þeir hafa ákveðið þetta út frá því að Valgeir er fljótari og betur til þess fallinn að elta þessa fljótu leikmenn Hollands en Brynjar Ingi. Þeir hafa kannski ákveðið það á sunnudeginum að fara frekar í Valgeir. Ég held að það sé miklu frekar málið en að hann treysti ekki Brynjari. Ég er ekkert viss um að hann hafi treyst honum, hafi frekar bara viljað sjá hann meira,“ sagði Hrafnkell um þetta mál.

Umræðan um landsliðið í heild er í spilaranum.