Kevin Kilbane, sparkspekingur TSN Sports, hefur fengið harða gagnrýni frá enskum stuðningsmönnum eftir ummæli sem hann lét falla á dögunum.

Kilbane tjáði sig um vængmanninn Bukayo Saka og ásakaði Arsenal manninn um að þykjast vera meiddur í leikjum og biðja um skiptingu.

Saka spilaði með enska landsliðinu gegn Íslandi í 1-0 tapi á föstudag en kom þar inná sem varamaður.

Kilbane á að baki leiki í efstu deild Englands en hann segir Englendingum að vera tilbúnir fyrir lokakeppni EM í sumar.

,,Passið ykkur á EM og þá líka með Saka. Hann mun haltra af velli þegar 20 mínútur eru eftir og verður svo tæpur fyrir næsta leik en nær svo loks að spila þann sama leik,“ sagði Kilbane.

Enskir stuðningsmenn voru ekki lengi að hrauna yfir Kilbane á samskiptamiðlum og létu ýmislegt flakka.

,,Rekið þennan mann núna. Þessi ummæli eru til skammar. Þvílíkur trúður,“ skrifar einn og taka margir undir.

,,Hver í fjandanum ert þú að tjá þig um Bukayo Saka sem er tíu sinnum betri leikmaður en þig gat dreymt um að vera,“ segir annar og bætir sá þriðji við: ,,Haltu þig við Írland og grjóthaltu kjafti.“