Þorsteinn Halldórsson, landsliðsþjálfari og Glódís Perla Viggósdóttir, landsliðsfyrirliði, sátu fyrir svörum á blaðamannafundi í Laugardalnum í dag fyrir komandi leik gegn Austurríki í undankeppni EM á morgun. Það er ríkir bjartsýni fyrir leiknum.
Liðin gerðu 1-1 jafntefli ytra fyrir helgi og eru bæði með 4 stig í öðru og þriðja sæti riðilsins. Efstu tvö liðin fara beint á EM en neðri tvö í umspil. Það er því til mikils að vinna á morgun og Ísland getur komið sér í sterka stöðu.
„Heilt yfir getum við horft í frammistöðuna og verið jákvæð. Við erum bara bjartsýn fyrir morgundaginn. Við förum í þennan leik til að vinna hann og það er ekkert annað sem kemst að. Við vitum að þetta verður hörkuleikur og við munum spila til sigurs,“ sagði Þorsteinn á fundinum.
„Mikilvægi leiksins er mikið. Það skiptir okkur máli að sigra á morgun. En við vitum að við þurfum að hafa fyrir því og spila hugsanlega betur en í síðasta leik, þó við séum sátt við margt sem við gerðum þar.“
Glódís var spurð að því hvort íslenska liðið liti á þetta sem úrslitaleik um sæti á EM.
„Já og nei. Við erum auðvitað tvö lið að berjast um annað sætið og að fara beint á EM. Við förum klárlega í leikinn til að vinna hann en ég er viss um að bæði lið gera það. Þetta verður hörkubarátta. Ef það verður vont veður verður þetta eins og stríð um þennan farmiða. En það er ekkert klárt, sama hvernig þessi leikur fer,“ sagði Glódís, en bæði lið eiga eftir að mæta Póllandi og Þýskalandi einnig áður en keppni í undanriðlunum lýkur.
