Svo gæti farið að Arsenal þurfi að treysta á West Ham í lokaumferð ensku úrvalsdeildarinnar, ætli liðið sér að hampa Englandsmeistaratitlinum.

Arsenal þarf að vinna lokaleik sinn gegn Everton um næstu helgi og treysta á að Manchester City misstígi sig gegn annað hvort Tottenham á morgun eða West Ham í lokaumferðinni til að verða Englandsmeistari.

Stjóri West Ham, David Moyes, virðist ekki of bjartsýnn fyrir leikinn gegn City.

„Það yrði erfitt að stoppa U-14 ára liðið þeirra frá því að vinna titilinn,“ sagði hann og hló.

„Ég hef sagt leikmönnunum að við verðum að vera faglegir. Við munum gera okkar besta.“