Helgi Fannar Sigurðsson skrifar frá Wroclaw

Íslendingar eru farnir að láta til sín taka í pólsku borginni Wroclaw en hér mætir karlalandsliðið okkar Úkraínu í úrslitaleik um sæti á EM í kvöld.

Það má gera ráð fyrir 4-500 Íslendingum á leiknum í kvöld og þar á meðal er að sjálfsögðu einn dyggasti stuðningsmaður landsliðsins og meðlimur Tólfunnar, Joey Drummer. Hann hefur verið meðlimur Tólfunnar frá stofnun, eða 2007.

„Ég er brattur og líður vel. Það er gott veður og fullt af Íslendingum hérna. Ég er mættur til að taka eitt stórmót í viðbót áður en ég legg kjuðann á hilluna,“ sagði Joey við 433.is í miðbæ Wroclaw í dag.

Joey vill að sem flestir Íslendingar fái að upplifa að fara á stórmót.

„Þessi mánuður á EM í Frakklandi er það besta sem ég hef upplifað. Ég vil að aðrir landsmenn fái að upplifa þetta í sumar.“

Hann spáir 2-1 sigri Íslands.

„Ég veit ekki hvort ég sé að vanmeta Úkraínu en ég er ekkert voðalega smeykur við þá eins og allir eru að tala um. Ég veit ekki hvort maður sé bara orðinn heilaþveginn eftir Lars (Lagerback)-tímann.

Markmiðið er bara að gera allt sem ég get til að hjálpa okkur að komast á EM og svo læt ég kjuðann niður,“ sagði Joey en nánar er rætt við hann í spilaranum.