Toni Kroos ákvað að leggja landsliðsskóna á hilluna árið 2021 og var það ákvörðun sem kom mörgum á óvart.

Kroos sagði skilið við liðið eftir tap gegn Englandi á EM 2021 en Þýskaland féll úr keppni í 16 liða úrslitum.

Hann ákvað þó að draga þá ákvörðun til baka fyrr á þessu ári og sneri aftur í landsliðið í gær er Þýskaland vann Frakkland, 2-0.

Kroos spilaði frábærlega í leiknum og fékk mikið hrós frá landsliðsþjálfara sínum Julian Nagelsmann eftir leik.

,,Þetta var ótrúlegt ef ég á að vera alveg hreinskilinn,“ sagði Nagelsmann um Real Madrid stjörnuna.

,,Með boltann þá vitum við öll að hann er framúrskarandi leikmaður en líka hvernig hann fór í öll návígi.“

,,Toni er nokkuð venjulegur náungi og smellpassar í hópinn sem er frábært fyrir okkur.“