Guðmundur Þórarinsson, leikmaður íslenska landsliðsins var einlægur í svari sínu þegar hann var spurður um bróðir sinn, Ingólf Þórarinsson eftir sigur Íslands á Ísrael í gær.

Guðmundur var í byrjunarliði Íslands í 4-1 sigri á Ísrael þar sem liðið tryggði sér úrslitaleik um laust sæti á Evrópumótinu í sumar. Liðið mætir Úkraínu á þriðjudag.

Ingó Veðurguð, var einn af þeim tæplega 100 stuðningsmönnum Íslands sem studdi við íslenska liðið en hann og Guðmundur eru bræður og báðir ansi frambærilegir tónlistarmenn.

„Fáir íslenskir áhorfendur en einn af þeim var bróðir þinn, hann var í stúkunni. Var gott að finna fyrir honum þar?,“ spurði Stefán Árni Pálsson, íþróttafréttamaður á Stöð2 Sport eftir leikinn.

Guðmundur var einlægur í svari sínu. „Það sem hefur verið í gangi síðastliðin ár, geðveikt að hann skyldi komast á leikinn. Hann er á geggjuðu róli,“ sagði Guðmundur um bróðir sinn sem sat undir þungum ásökunum í Metoo byltingunni án þess þó að vera sóttur til saka vegna þess.

Guðmundur segir að það hafi gefið sér aukinn kraft að vita af Ingólfi í stúkunni en hann er eldri bróðir Guðmundar.

„Það var auðvelt að hlaupa í dag vitandi af honum þarna, það spilar allt saman. Ég á ekkert að tjá mig mikið um það núna, það er fótboltinn sem skiptir máli.“

„Það gefur manni auka kraft vitandi hvað við höfum gengið í gegnum síðustu misseri.“