Jess Carter leikmaður kvennaliðs CHelsea er mjög ósátt við þjálfara sinn eftir að hún setti út á það að kærustur væru saman í liði í atvinnumannafótbolta.

Carter er í sambandi við Ann-Katrin Berger en báðar eru þær hjá Chelsea.

Emma Hayes telur að pör geti truflað liðið en mikil umræða er um þetta á Englandi. Ástæðan er sú að þjálfari Leicester var settur til hliðar á dögunum vegna sambands við leikmann.

Carter hefur verið virk á X-inu frá því að Hayes lét ummælin falla og líkað við færslur þar sem drullað er yfir þjálfara hennar.

„Samband þjálfara og leikmanns er mjög óviðeigandi og samband leikmanns við leikmenn er það líka,“ segir Hayes

„Ég hef alltaf reynt að láta félagið hafa einhverjar reglur í þessu.“

Hún segir að það geti reynt á að vera með kærustupar í liði. „Það koma áskoranir með þessu.“

„Ein þeirra er kannski í liðinu en hin ekki, önnur þeirra er að verða samningslaus en hin ekki. Þetta flækir alla hluti rosalega mikið.“