Þorsteinn H. Halldórsson, landsliðsþjálfari Íslands segir alla leikmenn heila heilsu fyrir slaginn gegn Serbíu á morgun. Um er að ræða seinni leik liðanna í umspili Þjóðadeildarinnar.

Liðið sem fer með sigur á morgun heldur sæti sínu í A-deild Þjóðadeildar. Fyrri leikurinn fór fram í Serbíu og endaði 1-1.

„Við viljum bæta ýmsa hluti, við viljum aðeins vera beinskeyttari með boltann. Halda betur í hann ofar á vellinum, reyna að búa til fleiri möguleika,“ sagði Þorsteinn á fréttamannafundi í dag.

„Í seinni hálfleik náðum við að spila í gegnum fyrstu pressuna en gekk illa þegar fremstu menn komust í boltann, þá misstu við hann fljótt.“

Þorsteinn segir það skipta miklu máli að íslenska liðið haldi sér í deild þeirrar bestu. „Þetta skiptir máli upp á framhaldið, varðandi umspil og annað. Það skiptir máli að vera í A-deild Þjóðadeildarinnar.“

Allir leikmenn íslenska hópsins eru klárir á morgun. „Það voru allar með á æfingu í dag, smá hnjask hér og þar en nánast allar klárar.“

Leiktíminn er ekki hentugur fyrir vinnandi fólk en hann hefst klukkan 14:30 á Kópavogsvelli. „Þetta er veruleikinn sem við erum í, sýnir stöðuna á íslenskum fótbolta varðandi gæði valla og umgjarðar. Við eigum ekki völl til að spila á, það kom aldrei til greina hjá UEFA að hann færi fram að kvöldi til.“

Þorvaldur Örlygsson var kjörinn formaður KSÍ um helgina og er Þorsteinn sáttur með það. „Ég held að það væri erfitt fyrir mig að segja eitthvað neikvætt, Toddi er toppmaður. Vonandi koma ferskir vindar með honum og hann nái að sameina hreyfinguna.“