Sagnfræðingurinn og íþróttaáhugamaðurinn Stefán Pálsson var gestur Íþróttavikunnar sem kemur út á 433.is, Hringbraut.is og í Sjónvarp Símans alla föstudaga. Helgi Fannar Sigurðsson og Hrafnkell Freyr Ágústsson hafa umsjón með þættinum.

Stefán er mikill Framari og sér hann bjarta tíma framundan með Rúnar Kristinsson í brúnni.

„Andinn er góður þarna upp frá. Þó það sé kjánalegt að vera enn þá að tala um nýja hverfið og völlinn eru þetta mikil viðbrigði frá okkur, ekki bara því Fram var að flytja úr litlu hverfi, heldur líka því Fram var félag sem hafði varla haft hverfi. Félagið hafði verið að sækja iðkendur héðan og þaðan. Þeir voru með gott recruitment teymi með kókómjólk og strætókort um árabil,“ segir Stefán léttur.

„Nú erum við allt í einu komin í hverfi sem er töluvert rótgróið. Fólk er búið að búa í Grafarholti ansi lengi og meira að segja í Úlfarsárdalnum líka. Þetta er mjög afmarkað samfélag og það er strax orðið þannig að það þurfa allir að mæta á þorrablótið. Það mæta allir á völlinn. Ég er að sjá fólk sem ég þekki ekki neitt eftir að hafa tekið öll þessi ár í 300 manna hópi í stúkunni á Laugardalsvelli.“

Stefán er brattur fyrir komandi leiktíð.

„Ég er sallarólegur. Við verðum bikarmeistarar og mögulega Reykjavíkurmeistarar líka. Það er allt að gerast og við erum bara á mjög góðri leið.“

Umræðan í heild er í spilaranum.