Það var staðfest í morgun að Freyr Alexandersson hefði yfirgefið danska félagið Lyngby og væri tekinn við KV Kortrijk í belgísku úrvalsdeildinni.

Freyr tók við Lyngby árið 2021 í dönsku B-deildinni og hefur skilað af sér frábæru starfi. Liðið er nú um miðja úrvalsdeild eftir að hafa haldið sér uppi sem nýliði í fyrra. Nú fer hann hins vegar annað.

Íslendingarnir Gylfi Þór Sigurðsson, Andri Lucas Guðjohnsen, Sævar Atli Magnússon og Kolbeinn Birgir Finnsson spila með liðinu.

„Hvað þýðir þetta fyrir Gylfa?“ spurði Hjörvar Hafliðason í hlaðvarpi sínu, Dr. Football, eftir að ljóst var að Freyr væri á förum frá Danmörku.

Gylfi sneri aftur á fótboltavöllinn í haust eftir tveggja ára fjarveru og skrifaði hann undir hjá Lyngby.

„Ég get alveg trúað því að Gylfi setjist niður með forráðamönnum Lyngby og losi sig strax,“ sagði Hrafnkell Freyr Ágústsson, sparkspekingur.

„Hann fór í Lyngby út af Freysa. Hann er stór ástæða fyrir því að hann er þarna,“ bætti hann við.