Freyr Alexandersson er hættur með Lyngby og tekur við belgíska úrvalsdeildarliðinu Kortrijk. Þetta hefur vakið mikil viðbrögð danskra knattspyrnuáhugamanna.
Danski miðillinn BT segir að Freyr fari frá Lyngby til að taka við erlendu liði en Bold.dk segir frá því að Kortrijk sé að kaupa hann. Aðstoðarmaðurinn Jonathan Hartmann sé einnig á förum.
Það kemur einnig fram að Freyr ferðist til Belgíu í dag og skrifi undir á morgun.
Freyr tók við Lyngby árið 2021 í dönsku B-deildinni og hefur skilað af sér frábæru starfi. Liðið er nú um miðja úrvalsdeild eftir að hafa haldið sér uppi sem nýliði í fyrra.
Íslendingarnir Gylfi Þór Sigurðsson, Andri Lucas Guðjohnsen, Sævar Atli Magnússon og Kolbeinn Birgir Finnsson spila með liðinu.
Freyr var fyrr á tímabilinu orðaður við OB og Viborg í Danmörku en nú virðist sem svo að hann fari í aðra deild.
Hér að neðan má sjá brot af því sem danskir netverjar höfðu að segja á X (áður Twitter) við brotthvarfi Freys:
„Freyr hefur verið ótrúleg gjöf fyrir deildina í heild og þetta er ekki bara missir fyrir Lyngby, heldur deildina alla. Hann passaði fullkomlega inn í Lyngby og sýndi að hann er ekki bara góður þjálfari, heldur góð manneskja einnig.“
„Líkurnar á að Lyngby falli færast allt í einu hressilega í aukanna. OB og Viborg eru betri gæðalega séð og svo eru Randers þarna líka.“
„Alexandersson var frábær. Bjó til frábært vinnuumhverfi og menningu í liðinu og tókst það ómögulega.“
„Jæja, nú er morgunverðurinn minn ónýtur.“
„OB, Randers og Vejle hljóta nú að þakka Lyngby fyrir að mæta til leiks í fallslaginn.“
„Vonandi kaupir Lyngby 10 þúsund Carlsberg í kveðjugjöf. Hans verður saknað.“
