Það var rífandi stemning í Íþróttavikunni með Benna Bó á föstudaginn þegar Halldór Gylfason, leikari, og Jóhann Alfreð, uppistandari og dómari í Gettu Betur, fengu sér sæti.

Það var mikið rætt og ritað um afrekssjóð ÍSÍ í vikunni en KSÍ fékk ekki krónu frá afrekssjóði þetta árið og KKÍ fær fáar krónur. Sagði formaður KKÍ að framtíð körfuboltalandsliðanna sé í hættu.

„Þurfa þá landsliðsmenn í körfubolta að fara selja klósett pappír og rækjur?“ spurði Halldór.

ÍSÍ svaraði umræðunni á Vísi.is um landslagið í íþróttum þar sem fram kom að KSÍ sé eina sambandið þar sem ekkert kostar fyrir yngri iðkendur að vera í landsliðsstarfi. Benedikt benti á að ef svo óheppilega vill til að einhver sé góður í annari íþrótt en fótbolta og sé valinn í landsliðið þá kostar það. „Mér finnst þetta sérstakt því á sama tíma er eiginlega ákveðið að byggja nýja höll fyrir 15 milljarða. En við þurfum að vísu nýja höll. Það er kominn tími á það.“

Halldór spurði þá hvers vegna og fékk útskýringar á því og að KKÍ og HSÍ sé á undanþágum. „Þjóðarhöllinn fór úr átta milljörðum í 15 á engum tíma,“ sagði Jóhann. „Þegar á að byggja þessar rosa byggingar sem á einhverjum tímapunkti muni taka 10 þúsund manns kannski einu sinni á ári en svo er þetta tómt hina daga ársins. Manni finnst þetta svo miklir peningar. Það er smá sóun eða skringilega farið með peninginn. Samt er þetta nauðsynlegt,“ sagði Halldór og spurði í lokin. „Er ekki hægt að gera þetta eitthvað öðruvísi?“

Benedikt er á því að þjóðarhöllin sé alltof stór og benti á að það hefði sjaldan verið uppselt á bikarúrslit eða landsleiki í hand- eða körfubolta. „Ég held að átta þúsund manna höll, ef handboltalandsliðið er áfram spennandi þeir geta alveg trekkt að, en þetta eru örfáir leikir á ári,“ sagði Jóhann.