Brasilíska ungstirnið Endrick mun ganga í raðir Real Madrid í sumar. Hann var þó nálægt því að fara til Chelsea.

Endrick, sem er á mála hjá Palmeiras í heimalandinu, mun ganga í raðir Real Madrid þegar hann verður 18 ára gamall. Þykir hann mikið efni.

„Við fengum fengum boð frá eiganda Chelsea og heimsóttum félagið. Við sáum Chelsea spila gegn Arsenal og fengum að hitta þjálfara, aðstöðuna og hittum leikmenn eins og Jorginho, Cesar Azpilicueta og Thiago Silva,“ segir faðir Endrick, Douglas.

„Þeir útskýrðu allt fyrir okkur. Við fengum að hitta konuna sem átti að hjálpa okkur að aðlagast. Hún sýndi okkur húsið sem við hefðum búið í, skólann sem Endrick hefði farið í og kirkjuna. Það var allt til staðar til að fara til Chelsea en svo varð U-beygja á síðustu stundu.

Samningar höfðu náðst en þá hringdi eigandi Chelesa og sagði að verðið á Endrick myndi blása upp markaðinn. Þetta voru 60 milljónir evra fyrir 16 ára dreng sem kæmi ekki fyrr en tveimur árum síðar. Svo koma Real Madrid inn í myndina.“

Endrick er ansi spennandi leikmaður sem getur spilað allar stöðurnar fremst á vellinum.