FC Bayern í Þýskalandi hefur áhuga á því að kaupa Raphael Varane varnarmann Manchester United í janúar en hann er ekki í náðinni hjá Erik ten Hag.
Miðað við fyrri orð Varane er talið ólíklegt að hann fari en hann hefur látið hafa eftir sér að hann spili ekki fyrir nýtt félag.
Ten Hag hefur tekið þá ákvörðun að spila frekar Harry Maguire, Jonny Evans og Victore Lindelöf. Bild í Þýskalandi segir að þetta sé að vekja áhuga hjá FC Bayern sem er að skoða það að kaupa hann.
„Ég mun ljúka ferlinum í Madríd, Manchester eða Lens. Ég spila ekki fyrir nýtt félag,“ sagði Varane en þetta eru félögin þrjú á ferli hans.
Bayern vill bæta við varnarmanni í janúar og samkvæmt Bild hefur United látið Bayern vita hver verðmiðinn er. Segir að United vilji fá 18-25 milljónir punda í sinn vasa til að losna við Varane sem er einn af launahæstu leikmönnum félagsins.
„Það er flókið að fara aftur til Real Madrid, leikmenn fara ekki oft aftur þangað. Það er líklegast í dag að ég ljúki ferlinum hjá Manchester United eða Lens.“
