Fyrrum vandræðagemsinn Royston Drenthe hefur ákveðið að leggja skóna á hilluna 36 ára gamall.

Þetta hefur Drenthe sjálfur staðfest en hann var gríðarlegt efni á sínum tíma og lék með liðum eins og Real Madrid og Everton.

Drenthe vakti mest athygli árið 2007 en hann var þá valinn besti leikmaður EM U21 er Holland vann England í úrslitaleik.

Drenthe hefur lítið spilað undanfarin ár en síðasta þekkta lið hans var Sparta Rotterdam og lék hann þar 2018-2019.

Hann endar ferilinn sem leikmaður Kozakken Boys í heimalandinu en um er að ræða 91 árs gamalt félag sem leikur í utandeildinni.

Drenthe lék alls 305 leiki á sínum ferli og skoraði 39 mörk og þar á meðal 65 leiki fyrir Real.