Kári Árnason, fyrrum landsliðsmaður, var ekki of sáttur með frammistöðu liðsins gegn Slóvakíu í undankeppni EM í kvöld.

Ísland komst yfir í þessari viðureign en fékk í kjölfarið á sig fjögur mörk og urðu lokatölur 4-2 sem þýðir að Slóvakía er komið á EM.

Kári ræddi við Stöð 2 Sport eftir lokaflautið í kvöld en hann var gestur í settinu ásamt Lárusi Orra Sigurðssyni.

Kári er einn besti varnarmaður í sögu Íslands og þekkir það vel að spila fyrir landsliðið og gagnrýndi spilamennsku liðsins í viðureigninni.

,,Mér fannst við taka skref aftur á bak, mér fannst þetta ekki gott og einu mómentin sem við eigum í leiknum er þegar leikurinn er búinn. Þá fara menn að spila og beita lengri boltum, Andri Lucas gerir vel þegar hann kemur inná og linkar upp með öðrum leikmönnum en það er svo stutt á milli. Við vorum aldrei góðir í þessum leik, aldrei en við skorum samt tvö mörk,“ sagði Kári við Stöð 2 Sport.

,,Það sem ég set spurningamerki við er hvernig við ákváðum að pressa. Við fundum ekki taktinn hvenær við áttum að pressa og það gerist oft í leikjum að lið eru eitthvað off í pressunni en ég set spurningamerki við það að láta vængmennina hlaupa þessa leið til að setja pressu á hafsenta hins liðsins. Við sáum þetta trekk í trekk í leiknum að miðsvæðið var galopið og þeir fengu að spila að vild.“