Jón Rúnar Halldórsson, stjórnarmaður í ÍTF og fyrrum formaður knattspyrnudeildar FH segir að íþróttahreyfingin verði að fara að láta heyra meira í sér. Hann segir aðstöðumál og fleira ekki geta setið á hakanum lengur.

Jón Rúnar og fleiri eru á því að bæði ríki og sveitarfélög hafi svelt íþróttahreyfinguna fjármagni í alltof langan og gerð var skýrsla um slíkt.

„Við í ÍTF gerðum skemmtilega skýrslu, framlög ríkisins til íþróttamála. Við erum búnir að fara með þetta á milli manna, háttsettra, miðjusettra og hvar þeir eru í stiganum. Það er mikill skilningur og það á að gera eitthvað, það gerist ekkert,“ segir Jón í hlaðvarpsþættinum Tveir á tvo.

Jón Rúnar segir að knattspyrnuhreyfingin hafi of lengi ekki haft nógu hátt um stöðu mála. „Við höfum ekki farið með gassagangi og heimtað hitt og þetta, að allt fari í skrúfuna ef ekkert er gert. Við þurfum að fara að sýna almenningi hvernig þetta er.“

Hann segir dæmið ekki ganga upp að ríkið setji alla ábyrgð á sveitarfélögin þegar kemur að aðstöðumálum.

„Það er bara ekki rétt að aðkoma ríkisins, að ríkið geti sagt endalaust að aðstaða sé á vegum sveitarfélaganna. Öll borgum við skatta, það er ekkert rétt að sumir hlutir geti verið á vegum ríkisins og aðrir ekki. Listir og menning, af hverju eru þau ekki á vegum sveitaraféalaga?,“ segir Jón og heldur áfram.

„Nei það er hefð fyrir því og ég er algjörlega sammála því, ég er fylgjandi því að því sé haldið á lofti. Það má ekki vera þannig að það sé endalaust hægt að gera ekki neitt fyrir íþróttir.“

Hann segir flesta skilja málið en ekkert gerast, betra væri ef ráðamenn væru bara heiðarlegir og segðu að íþróttir væru bara í ruslflokki.

„Við getum tekið pólitíska ákvörðun um það að vera D-lið, vera rusl. Það þarf einhver að koma og segja það, það væri miklu heiðarlegra. Að vera alltaf að þvæla og þykjast, það gengur ekkert mikið lengur.“

Viðtalið má heyra í heild hér að neðan.