Einn svakalegasti leikur tímabilsins í ensku úrvalsdeildinni til þessa fór fram í gærkvöldi þegar Tottenham tók á móti Chelsea.

Chelsea vann að lokum 1-4 sigur en lið Tottenham var tveimur mönnum færri frá 55. mínútu þegar Destiny Udogie fékk sitt annað gula spjald. Í fyrri hálfleik hafði Cristian Romero fengið að fjúka út af.

Tottenham hélt leikmönnum Chelsea í skefjum í 20 mínútur, tveimur mönnum færri í stöðunni 1-1. Þá brast stíflan hins vegar og Nicolas Jackson kom Chelsea yfir, en hann gerði þrennu í leiknum.

Það vakti gríðarlega athygli þegar leið á leikinn að Tottenham breytti leikplani sínu ekki þrátt fyrir að vera tveimur mönnum færri. Spilaði liðið með varnarlínuna hátt uppi og bar það reyndar árangur í nokkur skipti í færasköpun.

Var liðið þó oft á tíðum galopið til baka en markvörðurinn Guglielmo Vicario varði nokkrum sinnum frábærlega.

„Þetta er bara það sem við erum. Við munum gera þetta eins lengi og ég er hérna,“ sagði Ange Postecoglou, stjóri Tottenham, um ákvörðun sína að breyta ekki um leikstíl eftir leik.

„Þó við séum með fimm leikmenn eftir á vellinum munum við alltaf sækja.“