Enski fjölmiðlamaðurinn Richard Keys segir að dómgæslan í ensku úrvalsdeildinni sé hvergi nærri nógu góð. Hann segir of mörg mistök hafa verið gerð á þessari leiktíð og að það stærsta hafi komið í leik Newcastle og Arsenal á laugardag.

Newcastle vann 1-0 sigur á Arsenal en sigurmark Anthony Gordon var afar umdeilt.

„Hér erum við enn einu sinni, eins og í hverri andskotans viku. Þetta er ekki nógu gott og getur ekki haldið áfram. Ég stend við það sem ég hef áður sagt, dómararnir hérna eru ekki hæfir. Þeir eru vonlausir og eru að skemma bestu deild í heimi,“ skrifar Keys í pistli sínum í dag.

Mikel Arteta, stjóri Arsenal, hjólaði í dómgæsluna eftir leikinn gegn Newcastle og hefur verið töluvert gagnrýndur fyrir það.

„Ég er reiður líkt og Arteta og hann átti allan rétt á að vera reiður. Arsenal hefur líka allan rétt á að verja sinn mann. Ef við trúum á tjáningarfrelsi af hverju má þjálfari ekki segja hvernig honum líður eftir leik? Stuðningsmenn vilja heyra hvað þeirra maður er að hugsa.

Arteta átti fullan rétt á að vera reiður eftir eitt ósanngjarnasta atvik á tímabilinu til þessa – og það eru þó nokkur til að velja úr. Spurður Gary O’Neill eða Jurgen Klopp,“ skrifar Keys enn fremur.

Hann kallar einnig eftir því að fá að hlusta á samskipti dómara.

„Af hverju fáum við ekki að heyra hvað fer dómaranna á milli? Ef þeir hafa ekkert að fela, af hverju fáum við þá ekki að heyra hvað þeir eru að segja?“