Endurkoma Gylfa Þórs Sigurðssonar á fótboltavöllinn hefur gengið vonum framar, hann er byrjaður að skora fyrir landsliðið og félagslið sitt, Lyngby.

Gylfi Þór reimaði á sig markaskóna í kvöld fyrir Lyngby en hann skoraði þar tvö mörk. Fyrstu mörk hans fyrir félagið.

Gylfi Sigurdsson's 2nd goal vs Helsingør

The most both footed player of all-time & it's not even close. pic.twitter.com/JhHPdAIPO8

— SuperStatto™🇮🇸 (@StattoSuper) October 31, 2023

Þessi magnaði knattspyrnumaður var frá leiknum í rúm tvö ár en eftir að mál hans í Bretlandi var fellt niður, ákvað Gylfi að snúa aftur á völlinn.

Gylfi samdi við Lyngby í Danmörku til eins árs en líklegt verður að teljast að stærri félög í Evrópu fari innan tíðar að reyna að krækja í hann.

Gylfi hefur spilað vel með Lyngby og þrátt fyrir að vera 34 ára gamall gæti Gylfi átt nokkur góð ár eftir. Líklega klárar hann tímabilið með Lyngby en hér að neðan eru fimm kostir sem gæti komið á borð Gylfa á næsta ári.

La Liga á Spáni:

Gylfi Þór hefur sagt frá því að hann hafi notað síðustu ár í að læra spænsku, skref í La Liga væri ekki óhugsandi á næsta ári ef fram heldur sem horfir.

Seria A á Ítalíu:

Fótboltinn á Ítalíu gæti hentað Gylfa afar vel, ekki sami hraði og á Englandi en oft á tíðum mikil taktík þar sem klókindi Gylfa Þórs gætu nýst vel.

Mið-Austurlönd:

Í Sádí Arabíu eða í Katar gæti Gylfi Þór þénað verulegar upphæðir, lið þar í landi hafa í gegnum árin sýnt honum áhuga og þau gætu endurvakið hann ef Gylfi heldur áfram að spila svona vel.

Bandaríkin:

Í mörg ár hefur Gylfi Þór verið orðaður við félagaskipti í MLS deildina en fótboltinn þar í landi er á siglingu eftir að Lionel Messi mætti þangað.

Endurkoma til Englands:

Gylfi Þór átti mörg mögnuð ár á Englandi og félög þar í landi vita vel hvaða leikmann hann hefur að geyma, ólíklegt skref en myndi gleðja marga.